Veljid Hadjisin reagon ndaj komunikatës së JGP-së: “Përgjegjësia nuk mund t’u faturohet vetëm të tjerëve”

Dragash – Veljid Hadjisini, ish-asambleist i partisë VAKAT në Kuvendin Komunal të Dragashit, ka reaguar pas komunikatës së publikuar nga Jedinstvena Goranska Partija (JGP), duke theksuar se përgjegjësia për gjendjen aktuale në Gorë nuk mund t’u atribuohet vetëm aktorëve të tjerë politikë.   Në reagimin e tij publik, Hadjisini ngre një sërë pyetjesh lidhur me zhvillimet në Gorë, duke pyetur se kush mban përgjegjësi për migrimin e popullsisë, uzurpimin e pronës publike, shtrimin e rrugëve private me mjete publike dhe cilësinë e punimeve të financuara nga buxheti publik.   “Bartja e përgjegjësisë te të tjerët nuk ju liron nga përgjegjësia për gjendjen aktuale në të cilën ndodhet Gora”, ka shkruar ai.   Sipas Hadjisini-t, subjektet që kanë qenë pjesë e qeverisjes lokale nuk mund të shmangin përgjegjësinë politike për zhvillimet aktuale, pavarësisht pretendimeve se vendimmarrja reale është ushtruar nga faktorë të tjerë.   Ai thekson se përgjegjësia për situatën aktuale bie si mbi ata që sot akuzojnë, ashtu edhe mbi ata që akuzohen, por edhe mbi ata që, sipas tij, vazhdojnë të kalkulojnë me interesat e tyre politike.   Ky reagim vjen pas komunikatës së fundit të JGP-së, e cila ngriti shqetësime për transparencën në menaxhimin e mjeteve publike, keqpërdorimin e pronës shoqërore dhe çështje të tjera që, sipas partisë, po ndikojnë negativisht në zhvillimin e Gorës.   /Dragash Info/