Një dekadë nga pranimi i Kosovës në UEFA – rrugëtim historik dhe ambicie për të ardhmen

  Më 3 maj 2026 shënohet një moment historik për futbollin kosovar: 10-vjetori i pranimit të Kosovës në UEFA. Një dekadë më parë, më 3 maj 2016, në Kongresin e mbajtur në Budapest, u mor vendimi që ndryshoi përgjithmonë rrugën e sportit më të ndjekur në vend. Në atë ditë historike, anëtarësimi i Federata e Futbollit e Kosovës u miratua me 28 vota pro dhe 24 kundër – një rezultat i ngushtë që reflektonte debatet e forta politike dhe sportive që e shoqëruan procesin. Megjithatë, ky votim i hapi derën Kosovës për të marrë pjesë zyrtarisht në garat evropiane për klube dhe kombëtare. Vetëm pak ditë më vonë, Kosova u pranua edhe në FIFA, duke vulosur përfundimisht statusin ndërkombëtar të futbollit kosovar. Gjatë këtyre 10 viteve, Kombëtarja e Kosovës ka shënuar progres të dukshëm. Një nga momentet më të mëdha erdhi gjatë kualifikimeve për UEFA Euro 2020, kur Kosova ishte shumë pranë kualifikimit historik, duke arritur në fazën “play-off” të Ligës së Kombeve dhe duke tërhequr vëmendjen e gjithë Evropës me lojën e saj dinamike. Një tjetër arritje e rëndësishme ishte rrugëtimi deri në finalen e “play-off”-it për FIFA World Cup 2026, ku Kosova u mposht me rezultat minimal nga Turqia. Në nivel klubesh, skuadrat kosovare kanë fituar përvojë të çmuar në garat evropiane si Liga e Kampionëve dhe UEFA Europa Conference League. FC Ballkani u kualifikua dy herë në fazën e grupeve të Ligës së Konferencës, ndërsa FC Drita arriti në fazën e ligës dhe më pas në “play-off”, ku u eliminua nga NK Celje. Po ashtu, zhvillimi i infrastrukturës sportive, rritja e talenteve vendore dhe përfshirja e lojtarëve nga diaspora kanë ndikuar ndjeshëm në forcimin e futbollit kosovar. Emra të rinj vazhdojnë të dalin në skenë, ndërsa interesimi për futbollin mbetet i lartë në çdo cep të vendit. Dhjetë vite pas pranimit në UEFA, Kosova vazhdon rrugëtimin e saj me ambicie të mëdha: kualifikimin në një turne madhor dhe forcimin e pozitës në futbollin evropian. Ky përvjetor nuk është vetëm një rikujtim i një fitoreje diplomatike, por edhe një dëshmi e përparimit të vazhdueshëm në fushën e lojës. — Dragash Info