Zafir Berisha reagon ndaj deklaratave kërcënuese ndaj opozitës Ish-deputeti dhe veprimtari politik Zafir Berisha ka r…
Zafir Berisha reagon ndaj deklaratave kërcënuese ndaj opozitës
Ish-deputeti dhe veprimtari politik Zafir Berisha ka reaguar publikisht ndaj asaj që ai i cilëson si kërcënime dhe presione të fundit nga eksponentë të pushtetit aktual, të drejtuar nga kryeministri Albin Kurti.
Berisha ka deklaruar se në diskursin publik janë shfaqur mesazhe shqetësuese, ku opozitës i kërkohet të “ulë kokën”, të “bëhet e dëgjueshme” dhe të mos kundërshtojë qeverinë, gjë që sipas tij është e papranueshme në një shtet demokratik.
“Ne nuk e kemi ulur kokën asnjëherë dhe nuk do ta ulim as tani. As para askujt që tenton të frikësojë opozitën apo të imponojë heshtje politike,” ka deklaruar Berisha.
Ai ka theksuar se opozita ka përballuar presione edhe në të kaluarën dhe se nuk do të tërhiqet përballë, siç tha ai, tentativave për diskreditim dhe kontroll të opinionit publik.
Sipas Berishës, gjuha kërcënuese dhe polarizuese po dëmton rëndë klimën politike dhe po e helmon debatin publik në Kosovë, ndërsa ka kërkuar respektim të pluralizmit politik dhe lirisë së shprehjes.
Reagimi i tij vjen në një kohë të tensioneve të shtuara politike dhe debateve të ashpra mes pozitës dhe opozitës në vend.