Nedžmidin Sejdilar: “5 milionë euro për ujësjellësin – ku janë rezultatet?”

  Nedžmidin Sejdilar ka reaguar lidhur me gjendjen e furnizimit me ujë të pijshëm në Komunën e Dragashit, duke ngritur shqetësime për investimet shumëmilionëshe në rrjetin e ujësjellësit dhe mungesën e rezultateve konkrete.   Sipas tij, në shekullin XXI, në Komunën e Dragashit janë investuar rreth 5 milionë euro për ndërtimin e një ujësjellësi modern, megjithatë një numër i madh i qytetarëve ende nuk kanë furnizim të rregullt me ujë të pijshëm.   Ai thekson se kjo nuk është çështje politike, por një e drejtë themelore e njeriut, duke shtuar se qytetarët kanë të drejtë të dinë se ku kanë përfunduar 5 milionë eurot e investuara dhe pse problemi ende nuk është zgjidhur.   Sejdilar vlerëson se është e papranueshme që familjeve t’u ndërpritet furnizimi me ujë, ndërkohë që pas investimeve shumëmilionëshe vazhdojnë të përballen me mungesa dhe pasiguri.   Ai gjithashtu kërkon që, nëse ekzistojnë probleme teknike në ujësjellësin qendror që shkaktojnë ndërprerje ose devijim të furnizimit, qytetarët të informohen në mënyrë të qartë dhe në kohë.   Në reagimin e tij, Sejdilar i bën thirrje kryetarit të Komunës që të tregojë transparencë, përgjegjësi dhe të paraqesë një plan të qartë për zgjidhjen përfundimtare të problemit të furnizimit me ujë.   Sipas tij, nëse institucionet nuk janë në gjendje ta zgjidhin një problem që prej vitesh prek qytetarët, atëherë duhet të reflektojnë mbi përgjegjësinë e tyre dhe t’ua lënë drejtimin atyre që kanë dijen, aftësinë dhe vullnetin për të garantuar furnizim të rregullt dhe të sigurt me ujë të pijshëm.   Në fund, Sejdilar thekson se 5 milionë euro janë një shumë e madhe parash dhe se është plotësisht e arsyeshme të shtrohet pyetja pse qytetarët ende nuk e kanë shërbimin që u është premtuar dhe financuar me paratë e tyre.   Shënim: Qëndrimet e paraqitura në këtë lajm janë deklarime të Nedžmidin Sejdilar. Media e publikon reagimin në funksion të informimit të publikut, ndërsa institucionet përkatëse kanë të drejtë të paraqesin qëndrimin e tyre lidhur me këto pretendime.