Zafir Berisha kritikon ashpër diasporën: Patriotizëm virtual i ndikuar nga propaganda Ish-deputeti Zafir Berisha ka k…
Zafir Berisha kritikon ashpër diasporën: Patriotizëm virtual i ndikuar nga propaganda
Ish-deputeti Zafir Berisha ka kritikuar ashpër një pjesë të diasporës shqiptare, duke e akuzuar për mungesë të informimit real mbi situatën politike, ekonomike dhe të sigurisë në Kosovë, si dhe për ndikim të madh nga rrjetet sociale.
Sipas Berishës, një pjesë e qytetarëve që jetojnë jashtë Kosovës, të cilët vetëquhen “patriotë” dhe pretendojnë se e duan Kosovën më shumë se ata që jetojnë në vend, informohen kryesisht përmes platformave si TikTok, Facebook dhe Instagram.
Ai thotë se pikërisht këta persona iu përgjigjën thirrjeve të Dojena Mihalit dhe Dimal Bashës, duke organizuar më 28 dhjetor protesta me pretendimin për ta “çliruar” Kosovën nga “komandantë” që, sipas tyre, po punojnë për Serbinë.
Berisha e cilëson këtë qasje si pasojë të një krize të thellë morale, e cila sipas tij nuk ka lindur rastësisht.
“Kjo krizë është produkt i një lufte të gjatë psikologjike dhe propagandistike, e zhvilluar pa ndërprerje për më shumë se 25 vjet nga Serbia dhe argatët e saj në Kosovë”, ka deklaruar ai.
Sipas Berishës, kjo luftë propagandistike ka arritur të deformojë gjykimin e një pjese të shoqërisë, duke krijuar një realitet shqetësues ku, sipas tij, viktimat barazohen me fajtorët, ndërsa historia relativizohet në varësi të interesave politike të momentit.
Ai paralajmëron se një qasje e tillë përbën rrezik serioz për kohezionin shoqëror dhe për mënyrën se si trajtohet e kaluara e Kosovës.