Milazim Krasniqi: Procesi zgjedhor ishte skandaloz, rezultati i kalkuluar politikisht Analisti dhe publicisti Milazim…
Milazim Krasniqi: Procesi zgjedhor ishte skandaloz, rezultati i kalkuluar politikisht
Analisti dhe publicisti Milazim Krasniqi ka reaguar ashpër lidhur me zgjedhjet parlamentare të mbajtura më 28 dhjetor 2025, duke i cilësuar ato si rezultat i një procesi tërësisht të manipuluar dhe të dirigjuar politikisht.
Sipas Krasniqit, rezultati zgjedhor nuk mund të analizohet në mënyrë të rregullt demokratike, pasi, siç shprehet ai, i gjithë procesi – që nga caktimi i datës së zgjedhjeve e deri te blerja e votës me mjete nga buxheti shtetëror – ka qenë i kalkuluar dhe i korruptuar.
Ai rendit disa arsye kryesore për këtë vlerësim:
Sipas tij, nominimi i Glauk Konjufcës për mandatar, ndonëse dihej se nuk i kishte votat e nevojshme, ishte një manovër për të shtyrë zgjedhjet drejt fundvitit, periudhë kur në Kosovë kthehen mërgimtarët. Krasniqi e quan të pavërtetë deklaratën e presidentes Vjosa Osmani se ishte bindur se ekzistonin votat për formimin e qeverisë.
Në vijim, ai pretendon se presidentja Osmani ka pasur rol kyç në caktimin e datës 28 dhjetor, një datë që, sipas tij, i konvenonte si Lëvizjes Vetëvendosje ashtu edhe interesave të saj personale politike.
Krasniqi kritikon edhe partitë opozitare, duke e quajtur “naivitet dhe gabim të rëndë” pajtimin e tyre me datën e zgjedhjeve. Ai vlerëson se opozita ka pasur të drejtë të kërcënojë me bojkot, veçanërisht pas ndarjes së rreth 70 milionë eurove për fëmijë dhe pensionistë vetëm pak ditë para zgjedhjeve.
Një tjetër element shqetësues, sipas tij, është heshtja e shteteve të Kuintit ndaj këtyre abuzimeve. Krasniqi pretendon se kjo heshtje tregon dëshirën e faktorëve ndërkombëtarë për një “Qeveri Kurti 3” me mandat të fortë, për shkak të interesave gjeopolitike, përfshirë çështjen e Asociacionit/Zajednicës dhe afrimin me Serbinë.
Ai po ashtu e sheh qëndrimin pasiv të Serbisë gjatë procesit zgjedhor si dëshmi të një koordinimi me shtetet e Kuintit, duke pretenduar se Beogradi ka marrë garanci për formimin e Asociacionit, në përputhje me Planin franko-gjerman dhe Aneksin e Ohrit.
Sipas Krasniqit, një qeveri e fortë Kurti 3 u duhet aktorëve ndërkombëtarë edhe në rast të dënimeve eventuale të ish-krerëve të UÇK-së nga Gjykata Speciale, pasi reagimet e qytetarëve do të ishin më të lehta për t’u menaxhuar.
Në përfundim, Milazim Krasniqi e cilëson procesin zgjedhor si “skandaloz, të dirigjuar, të korruptuar dhe të kalkuluar”, duke shtruar pyetjen pse partitë opozitare ende nuk e kanë kontestuar rezultatin dhe pse nuk po e shqyrtojnë mundësinë e bojkotit të Kuvendit.
— Dragash Info
📌 Shënim editorial: Qëndrimet e paraqitura në këtë shkrim janë opinione personale të autorit dhe nuk përfaqësojnë domosdoshmërisht qëndrimin e redaksisë.