Banorët e fshatit Mlikë alarmojnë për deponinë e egër në hyrje të fshatit

Banorët e fshatit Mlikë, në komunën e Dragashit, kanë dërguar një letër publike drejtuar mediave lokale dhe qendrore, duke kërkuar publikimin e një problemi që sipas tyre po vazhdon prej kohësh dhe po dëmton imazhin e fshatit.   Sipas banorëve, hyrja e fshatit është shndërruar në një deponi të egër për shkak të hedhjes së paligjshme të mbeturinave ndërtimore dhe shtëpiake. Ata thonë se në këtë hapësirë çdo ditë hidhen mbetje të ndryshme, përfshirë materiale ndërtimore, mobilje të vjetra, plastikë, qese me mbeturina dhe mbetje të tjera.   Banorët theksojnë se, edhe pse në vend është vendosur tabelë që ndalon hedhjen e mbeturinave, disa persona vazhdojnë të veprojnë në mënyrë të papërgjegjshme duke lënë vazhdimisht mbeturina të reja.   Ata shprehen se problemi është raportuar disa herë tek institucionet përgjegjëse, por deri më tani nuk janë ndërmarrë masa serioze për pastrimin e hapësirës dhe ndalimin e krijimit të mëtejshëm të deponisë.   “Përveç prishjes së pamjes së fshatit, kjo situatë krijon një imazh shumë negativ për vendin përmes të cilit kalojnë banorët, vizitorët dhe kalimtarët. Hyrja në fshat duhet të jetë e pastër, e rregullt dhe dinjitoze për banorët që jetojnë këtu, jo një vend ku grumbullohen mbeturina”, thuhet ndër të tjera në letrën e banorëve.   Banorët e Mlikës kërkojnë nga institucionet kompetente që të reagojnë sa më shpejt, të largojnë mbeturinat ekzistuese dhe të marrin masa konkrete për të parandaluar hedhjen e mëtejshme të mbeturinave në këtë zonë.   Më poshtë gjeni letrën e plotë të banorëve të fshatit Mlikë:   “Të nderuar përfaqësues të mediave, ju drejtohemi në emër të banorëve të fshatit Mlike me kërkesën që të publikoni problemin që prej kohësh po shqetëson fshatin tonë dhe banorët e tij. Bëhet fjalë për hedhjen e paligjshme të mbeturinave ndërtimore dhe shtëpiake në hyrje të fshatit, për shkak të së cilës ky hapësirë është shndërruar në një deponi të egër.   Në këtë lokacion çdo ditë hidhen lloje të ndryshme mbeturinash, ndër të cilat mbetje ndërtimore, mobilje të vjetra, plastikë, qese me mbeturina dhe mbetje të tjera shtëpiake. Sasia e mbeturinave po rritet vazhdimisht, ndërsa hapësira që duhet të ishte hyrje e rregullt e fshatit sot duket e papastër dhe e lënë pas dore.   Veçanërisht shqetësuese është fakti se në atë vend ekziston një tabelë e vendosur qartë që ndalon hedhjen e mbeturinave. Megjithatë, pavarësisht kësaj, disa persona vazhdojnë të veprojnë në mënyrë të papërgjegjshme dhe çdo ditë lënë mbeturina të reja, duke injoruar paralajmërimet dhe rregullat.   Banorët e fshatit Mlike kanë ngritur disa herë këtë problem dhe kanë pritur reagimin e institucioneve përgjegjëse, por deri më sot nuk janë ndërmarrë masa serioze për të parandaluar krijimin e mëtejshëm të kësaj deponie të paligjshme. Mbeturinat nuk pastrohen rregullisht, ndërsa të reja vazhdojnë të hidhen në të njëjtin vend.   Përveç prishjes së pamjes së fshatit, kjo situatë krijon një imazh shumë negativ për vendin përmes të cilit kalojnë banorët, vizitorët dhe kalimtarët. Hyrja në fshat duhet të jetë e pastër, e rregullt dhe dinjitoze për banorët që jetojnë këtu, jo një vend ku grumbullohen mbeturina.   Banorët mendojnë se është koha e duhur që institucionet përgjegjëse ta trajtojnë seriozisht këtë problem, të largojnë mbeturinat ekzistuese dhe të marrin masa konkrete për të parandaluar hedhjen e mëtejshme të mbeturinave ndërtimore dhe shtëpiake.   Për të gjitha këto arsye, ju lutemi të publikoni këtë lajm në mënyrë që opinioni publik të njihet me problemin me të cilin përballen banorët e fshatit Mlike dhe që institucionet kompetente të reagojnë më në fund.” — Dragash Info