Prokuroria Speciale demanton deklaratat e Pecit për kallëzimin penal

Prokuroria Speciale demanton deklaratat e Pecit për kallëzimin penal Prokuroria Speciale e Republikës së Kosovës ka reaguar ndaj deklaratave të ish-ministrit të Bujqësisë, Faton Peci, lidhur me një kallëzim penal të pretenduar për keqpërdorim të granteve në bujqësi. Në një sqarim zyrtar, prokuroria ka bërë të ditur se kallëzimi penal që është hedhur poshtë nuk ka të bëjë me hetimet për dyshimet për keqpërdorim të granteve në sektorin e bujqësisë, siç është deklaruar nga Peci. Sipas këtij institucioni, rasti në fjalë lidhet me një kallëzim penal të paraqitur nga Lidhja Demokratike e Kosovës (LDK), i cili ka të bëjë me çështjen e ushtrimit të dy funksioneve njëkohësisht në Kuvend dhe në Qeverinë e Kosovës. “Rasti për të cilin po raportohet se është hedhur kallëzimi penal ndaj F.P., nuk ndërlidhet me hetimet për keqpërdorim të granteve në bujqësi, por me një çështje tjetër juridike”, thuhet në reagimin e prokurorisë. Prokuroria Speciale theksoi se mbetet e përkushtuar për informim të drejtë të opinionit publik, duke respektuar transparencën dhe integritetin e procedurave në zhvillim. — Dragash Info