Safet Kusi: “A ka ardhur koha t’i vihet dryni ‘konsullatës së Vuçiqit’ në Dragash?”
Safet Kusi, i cili prezantohet si kryetar i Vetëshpallur i Komunës së Gorës, ka reaguar me një deklaratë publike lidhur me, siç pretendon ai, diskriminimin ndaj komunitetit goran. Në deklaratën e tij, Kusi thotë se “diskriminimi ndaj goranëve ka kaluar çdo kufi dhe ka rrezikuar seriozisht të drejtat themelore të njeriut”, duke ngritur pyetje se kush qëndron pas zhvillimeve të fundit dhe duke përmendur emrat e presidentit të Serbisë, Aleksandar Vuçiq, Milan Radoiçiqit, Adem Hoxhës dhe kryetarit të Komunës së Dragashit, Bexhet Xheladini. Ai thekson se përgjigjet për këto çështje duhet t’i japin institucionet kompetente, në radhë të parë Prokuroria e Kosovës. Në të njëjtën deklaratë, Kusi falënderon Qeverinë e Kosovës dhe ministrin në detyrë, Rasim Demiri, për, siç shprehet ai, mbështetjen ndaj komunitetit goran. Gjithashtu, ai shpreh mirënjohje për Murat Mushkin, si dhe për qytetarët e Gorës dhe Opojës që, sipas tij, kanë dënuar publikisht padrejtësitë. Kusi pretendon se ka dështuar përpjekja e asaj që ai e quan “konsullata e Vuçiqit me seli në Dragash”, duke iu referuar subjektit JGP, për të penguar mbajtjen e manifestimit kulturor “Dita e Diasporës së Gorës”. Sipas tij, Adem Hoxha prej vitesh përpiqet të pengojë organizimin e kësaj ngjarjeje dhe të ndikojë në ndarjen e mjeteve financiare, duke favorizuar organizata të caktuara joqeveritare. Ai pretendon se këto organizata përfitojnë fonde më të mëdha, pa ofruar rezultate apo programe me interes për qytetarët. Në fund të deklaratës, Kusi shtron pyetjen: “Kujt i pengon ‘Dita e Diasporës së Gorës’ dhe pse tentohet vazhdimisht të pengohet tubimi i goranëve?”, duke kërkuar përgjegjësi nga të gjithë ata që, sipas tij, keqpërdorin pozitën e tyre në dëm të komunitetit. Deklarata është nënshkruar nga Safet Kusi, në emër të, siç thuhet, qytetarëve të diskriminuar të Gorës dhe në emrin e tij personal. Shënim: Ky lajm bazohet në deklaratën publike të Safet Kusit. Pretendimet e paraqitura në të janë qëndrime të autorit të deklaratës dhe nuk janë verifikuar në mënyrë të pavarur nga redaksia.