Rrahmani: 61 ish-pjesëtarë të “Rojës së Urës” u paguan mbi 469 mijë euro, ndërsa FSK-së nuk i paguhen orët shtesë

Deputeti i Kuvendit të Kosovës, Eman Rrahmani, ka kritikuar Qeverinë për mënyrën e menaxhimit të mjeteve buxhetore, duke ngritur shqetësime lidhur me pagesat ndaj ish-pjesëtarëve të të ashtuquajturës “Roja e Urës” në veri të vendit.   Sipas Rrahmanit, 61 pjesëtarë serbë të kësaj strukture kanë përfituar gjithsej 469,885 euro gjatë vitit 2025, ndonëse, sipas tij, nuk kanë qenë të angazhuar në punë. Ai ka theksuar se këto pagesa janë realizuar përmes Ministrisë së Mjedisit, Planifikimit Hapësinor dhe Infrastrukturës.   Deputeti ka ngritur gjithashtu shqetësimin se pjesëtarëve të Forca e Sigurisë së Kosovës nuk u janë paguar orët shtesë të punës, duke pretenduar se vlera e detyrimeve të papaguara ndaj tyre arrin në rreth 2.8 milionë euro.   Sipas tij, kjo paraqet një padrejtësi ndaj ushtarëve të FSK-së, të cilët kontribuojnë për sigurinë e vendit, ndërsa persona të tjerë përfitojnë paga pa kryer detyrat e tyre.   “Kjo është një padrejtësi për ushtarët tanë, të cilët janë lënë pas dore, ndërsa të tjerë paguhen pa punuar”, ka deklaruar Rrahmani.   /Dragash Info/