Akuza për pazare politike në zgjedhjen e Presidentit – reagim i ashpër nga Nedžmidin Sejdilar

Një reagim i fortë publik ka ardhur nga Nedžmidin Sejdilar, i cili ka komentuar zhvillimet politike lidhur me zgjedhjen e Presidentit të Kosovës, duke ngritur akuza për prapaskena dhe marrëveshje të mundshme ndërmjet akterëve politikë. Në reagimin e tij, ai përmend edhe emra konkretë si Lumir Abdixhiku, Vjosa Osmani, Bexhet Xheladini, Adem Hoxha dhe Duda Balje, duke i lidhur ata me skenarë të mundshëm të sigurimit të votave në rast se nuk arrihen numrat e nevojshëm. Reagimi i plotë i përkthyer në shqip: “Lumir Abdixhiku duket se ka një ambicie serioze për ta shtyrë sërish Vjosa Osmanin në postin e Presidentes së Kosovës. Kjo nuk është aspak befasuese — edhe herën e kaluar, Vjosa qëndroi në këtë pozitë me ndihmën e Listës Serbe dhe lidhjeve nga Kopaoniku. Këtë herë, nëse matematika përsëri nuk del dhe nëse nuk sigurohen numrat e nevojshëm, ndoshta do të ishte më mirë që menjëherë të kontaktohet Bexhet Xheladini. Ai të paktën di se si bëhen marrëveshjet e koalicionit në Dragash dhe si dhe kur duhet, “aktivizohet mekanizimi”. Le të thërrasë Bexhet Xheladini partnerët e tij të koalicionit — Ademin Hoxhën dhe Dudë Baljen — që secili të bëjë pjesën e vet. Duda le të aktivizojë linjën përmes Komshiut Zvonko, i njohur për punët ndërtimore në vendlindjen e saj, ndërsa Adem Hoxha le të përdorë lidhjet përmes vëllait nga Kopaoniku. Kur politika tashmë po shndërrohet në një treg interesash, të paktën qytetarët le ta shohin qartë kush tregton, kush ndërmjetëson dhe kush vetëm shtiret si parimor. Ndërkohë, nëse arrijnë të aktivizojnë edhe atë që në qarqet politike prej kohësh quhet spiun i UDB-së, Uzair Hamzën, që nga Beogradi të sjellë autobusë me pensionistë dhe njerëz të cilëve u premtohen shtëpi, atëherë fitorja do të jetë më shumë se absolute. Atëherë nuk do të bëhet më fjalë për zgjedhje, por për një operacion të organizuar politik, ku votat nuk kërkohen nga qytetarët, por paketohen, transportohen dhe dorëzohen si mall. Tani është shumë më e qartë pse Abdixhiku, para konsultimeve për zgjedhjen e Presidentit, vizitoi pikërisht Bexhet Xheladinin në Dragash. Kjo, me sa duket, nuk ishte një vizitë formale, por një skanim politik i terrenit dhe një testim nëse rrjeti i vjetër ende mund të sigurojë atë që kërkohet prej tij. Dhe prandaj askush të mos flasë më për parime, demokraci dhe përgjegjësi institucionale. Këtu bëhet fjalë për të njëjtën tregti të vjetër politike: disa shtiren si burra shteti, të tjerë si përfaqësues të komuniteteve, disa presin urdhra, të tjerë aktivizojnë “mekanizimin”, ndërsa të tjerë nga prapaskena numërojnë sa njerëz duhen për ta mbyllur llogarinë. Qytetarët nuk janë të verbër. Vetëm se për një kohë shumë të gjatë u është servirur e njëjta shfaqje me të njëjtat metoda, të njëjtët tregtarë dhe me paketim të ndryshëm.” Shënim: Ky lajm përmban deklarata dhe pretendime të autorit dhe nuk përfaqëson domosdoshmërisht qëndrime të verifikuara. — Dragash Info