Deliu-Kodra: Debati për seksizmin po përdoret për të shmangur thelbin e çështjes politike në Kuvend

Deliu-Kodra: Debati për seksizmin po përdoret për të shmangur thelbin e çështjes politike në Kuvend   Deputetja e PDK-së, Blerta Deliu-Kodra, ka reaguar lidhur me debatet e fundit në Kuvend, duke thënë se çështja e ngritur rreth deklaratave të cilësuara si seksiste ndaj Vlorës nuk duhet të shërbejë si devijim nga temat kryesore politike. Sipas saj, Vlora përfaqëson forcë, dinjitet dhe standard, duke theksuar se ajo tashmë ka tejkaluar çdo paragjykim dhe stereotip, dhe është kthyer në shembull frymëzimi për vajzat dhe gratë në Kosovë. Deliu-Kodra vlerëson se fokusimi i debatit vetëm në aspektin e seksizmit po përdoret si mënyrë për të shmangur, siç u shpreh ajo, deklaratat “malicioze” që lidhen me kërkesat për dënimin e ish-presidentit Hashim Thaçi, duke e cilësuar këtë si shmangie nga thelbi i problemit. Ajo theksoi se Kuvendi duhet të reagojë ndaj çdo forme ofendimi dhe gjuhe denigruese, por njëkohësisht, sipas saj, duhet të vendoset kufi ndaj “mentalitetit të ofendimeve kronike”, duke mos e reduktuar debatin vetëm në një rast të veçantë. “Nuk është vetëm çështje e një fjale, por e një mendësie që përsëritet”, ka theksuar ajo. Në reagimin e saj, Deliu-Kodra ka bërë thirrje që Kuvendi të mbrojë dinjitetin institucional dhe të përballet me, siç tha ajo, nivelin e ulët të diskursit politik, duke kërkuar që të mos harrohet roli i figurave që kanë kontribuar në themelimin e shtetit. Reagimi i saj vjen në një kohë tensionesh të rritura politike dhe debatesh të ashpra në skenën parlamentare. — Dragash Info