KQZ nis shërbimin për ndërrimin e qendrave të votimit edhe jashtë periudhës zgjedhore

KQZ nis shërbimin për ndërrimin e qendrave të votimit edhe jashtë periudhës zgjedhore Komisioni Qendror i Zgjedhjeve (KQZ) ka filluar ofrimin e shërbimit për ndërrimin e qendrës së votimit brenda komunës edhe në periudhë jozgjedhore. Ky zhvillim, ndonëse mund të duket si pjesë e përgatitjeve për zgjedhje, sipas KQZ-së nuk ka të bëjë me ndonjë proces të mundshëm zgjedhor apo zgjedhje të parakohshme. Zëdhënësi i KQZ-së, Valmir Elezi, ka bërë të ditur se ky është një obligim ligjor që buron nga Ligji për Zgjedhjet e Përgjithshme dhe është pjesë e funksioneve të rregullta të institucionit. “Ky aktivitet ndihmon në përmirësimin dhe saktësimin e listës votuese për proceset e ardhshme zgjedhore, pavarësisht se kur ato mbahen”, ka theksuar Elezi. Sipas tij, votuesit kanë mundësinë që në mënyrë vullnetare të kërkojnë ndërrimin e qendrës së votimit brenda komunës së tyre, në mënyrë që ajo të jetë sa më afër vendbanimit. Kërkesa për këtë shërbim mund të bëhet online përmes platformës elektronike të KQZ-së ose fizikisht në Komisionin Komunal të Zgjedhjeve përkatëse. Nga KQZ bëhet e ditur se ndërrimi i qendrës së votimit nga një komunë në një tjetër nuk është i mundur përmes këtij shërbimi. Për një ndryshim të tillë, qytetarët duhet fillimisht të përditësojnë adresën e vendbanimit në Zyrën e Gjendjes Civile ose përmes platformës E-Kosova, proces që më pas reflektohet në Regjistrin Qendror Civil dhe në listën votuese. Ky shërbim synon të lehtësojë pjesëmarrjen e qytetarëve në votime dhe të rrisë saktësinë e të dhënave zgjedhore në të ardhmen. — Dragash Info