Universiteti i Prizrenit merr kryesimin e Asociacionit të Universiteteve Ballkanike për vitin 2026

Universiteti i Prizrenit merr kryesimin e Asociacionit të Universiteteve Ballkanike për vitin 2026 Universiteti “Ukshin Hoti” Prizren ka shënuar një arritje të rëndësishme në arenën akademike rajonale, duke marrë kryesimin e Asociacioni i Universiteteve Ballkanike (BUA) për vitin 2026. Ky asociacion përfshin mbi 100 universitete nga vendet e Ballkanit dhe synon forcimin e bashkëpunimit në fushën akademike, shkencore dhe kulturore. Përmes aktiviteteve të tij, BUA promovon shkëmbimin e studentëve dhe stafit akademik, zhvillimin e projekteve të përbashkëta kërkimore si dhe avancimin e cilësisë në arsimin e lartë. Përzgjedhja e universitetit prizrenas për të udhëhequr këtë rrjet të rëndësishëm konsiderohet një dëshmi e besimit të partnerëve ndërkombëtarë në kapacitetet institucionale të tij, por edhe një vlerësim për sistemin e arsimit të lartë në Kosovë. Takimi i fundit i këtij asociacioni është mbajtur në Podgoricë, ku universiteti u përfaqësua nga prorektorët Serdan Kervan, Luan Vardari dhe Adelina Rakaj, së bashku me përfaqësues të universiteteve anëtare dhe kandidate. Në kuadër të këtij mandati, Universiteti “Ukshin Hoti” Prizren do të jetë nikoqir i konferencës së radhës të BUA-s, e cila pritet të mbahet në fund të vitit 2026 në Prizren. Kjo ngjarje pritet të shërbejë si një platformë e rëndësishme për forcimin e bashkëpunimit ndëruniversitar dhe promovimin e arsimit të lartë në nivel rajonal. — Dragash Info