Trumpi fton presidentin e Kolumbisë në Shtëpinë e Bardhë pas tensioneve të forta diplomatike Presidenti i Shteteve të…
Trumpi fton presidentin e Kolumbisë në Shtëpinë e Bardhë pas tensioneve të forta diplomatike
Presidenti i Shteteve të Bashkuara të Amerikës, Donald Trump, ka ftuar presidentin e Kolumbisë, Gustavo Petro, për një vizitë zyrtare në Shtëpinë e Bardhë, vetëm pak ditë pasi kishte shkaktuar reagime të ashpra duke e akuzuar atë për trafik kokaine dhe duke kërcënuar me ndërhyrje ushtarake ndaj qeverisë kolumbiane.
Ftesa erdhi pas një telefonate njëorëshe mes dy liderëve, gjatë së cilës janë diskutuar çështjet e trafikut të drogës, siguria rajonale dhe mosmarrëveshjet dypalëshe. Lajmi është raportuar nga Al Jazeera.
Trump ka deklaruar se e ka vlerësuar tonin e bisedës me presidentin Petro, duke shtuar se tashmë po zhvillohen përgatitje për një takim zyrtar në Uashington.
Nga ana e tij, presidenti kolumbian Gustavo Petro ka konfirmuar se pas telefonatës ka nisur një proces i zbutjes së tensioneve mes dy vendeve. Duke iu drejtuar protestuesve në Bogota, ai tha se dialogu me presidentin amerikan ka ndihmuar në shmangien e përshkallëzimit të krizës, ndërsa shtoi se i kishte paraqitur Trumpit të dhënat zyrtare të Kolumbisë për luftën kundër trafikut të drogës.
Marrëdhëniet mes Uashingtonit dhe Bogotës ishin përkeqësuar ndjeshëm pas deklaratave të Trumpit për një operacion të mundshëm ushtarak në Kolumbi, në kuadër të krizës rajonale të ndërlidhur me situatën në Venezuelë. Petro kishte reaguar ashpër, duke bërë thirrje për protesta masive në mbrojtje të sovranitetit kombëtar.
Pavarësisht përplasjeve politike dhe retorikës së ashpër, Shtetet e Bashkuara mbeten një partner strategjik i Kolumbisë, veçanërisht në luftën kundër narkotikëve dhe grupeve të armatosura, ndërsa bashkëpunimi në fushën e sigurisë dhe inteligjencës vazhdon.
— Dragash Info