Tahiri reagon ashpër ndaj Qeverisë: Propaganda ju ka verbuar, qytetarët i keni lënë në mëshirë të fatit Deputeti i Al…
Tahiri reagon ashpër ndaj Qeverisë: Propaganda ju ka verbuar, qytetarët i keni lënë në mëshirë të fatit
Deputeti i Aleancës për Ardhmërinë e Kosovës (AAK), Besnik Tahiri, ka reaguar ashpër ndaj Qeverisë së Kosovës, duke e akuzuar për dështim të plotë institucional në menaxhimin e situatës me vërshimet dhe incidentet e fundit në vend.
Përmes një reagimi publik, Tahiri ka theksuar se ekzekutivi po sillet me shpërfillje ndaj qytetarëve, duke vënë në plan të parë, sipas tij, rehatinë elektorale dhe propagandën politike, në vend të sigurisë dhe mirëqenies së njerëzve.
“Qytetari shihet vetëm si numër votash,” ka shkruar Tahiri, duke shtuar se për pesë vite me radhë kjo qeveri ka relativizuar çdo krizë dhe ka shtyrë çdo përgjegjësi.
Ai ka kritikuar ashpër qasjen e pushtetit, duke thënë se ajo ka degraduar deri në atë pikë sa qytetari nuk trajtohet më si hall real, por vetëm si mjet elektoral.
“Kur gjysma e vendit ndodhet nën ujë, qeveria në detyrë sillet me shpërfillje të papranueshme. Rehatia e rezultatit elektoral ka marrë përparësi ndaj jetës, pronës dhe dinjitetit të njerëzve,” ka deklaruar Tahiri.
Në reagimin e tij, deputeti i AAK-së ka përmendur edhe rastin e fundit në Gjakovë, ku u dogj një nga bizneset më të mëdha në vend, duke akuzuar institucionet për mungesë totale reagimi.
Sipas Tahirit:
Nuk pati asnjë prani zyrtare në vendngjarje
Nuk pati asnjë përgjegjësi institucionale
Nuk pati asnjë reagim nga institucionet qendrore
Ai shtoi se qeveria, e “verbëruar nga propaganda”, po shfaq mllef dhe arrogancë ndaj qytetarëve.
Tahiri ka kërkuar ngritjen e menjëhershme të një task-force kombëtare, e cila do të përfshinte institucionet qendrore, ato lokale si dhe kapacitetet teknike private, për t’u përballur me situatën emergjente.
Duke paralajmëruar për rënien e temperaturave, ai tha se qindra familje rrezikojnë të mbeten pa strehë.
“Mos flini më. Zgjedhjet kanë përfunduar. Është koha të veproni,” ka përfunduar Tahiri, duke iu drejtuar krerëve të shtetit.
— Dragash Info