SKANDALOZE | Ambasadori i BE-së pranon negociata 2-mujore jo publike me Qeverinë Kurti për Ligjin për të Huajt

SKANDALOZE | Ambasadori i BE-së pranon negociata 2-mujore jo publike me Qeverinë Kurti për Ligjin për të Huajt Ambasadori i Bashkimit Evropian në Kosovë, Aivo Orav, ka konfirmuar se për rreth dy muaj janë zhvilluar negociata jo publike me Qeverinë e Kosovës, të udhëhequr nga Albin Kurti, lidhur me zbatimin e Ligjit për të Huajt. Në një intervistë, Orav bëri të ditur se marrëveshja për shtyrjen e këtij ligji është arritur në orët e vona të natës, ndërsa paralelisht është dakorduar edhe krijimi i një procesi të përbashkët me ekspertë ndërkombëtarë për të monitoruar zbatimin e tij. Sipas tij, ligji është shtyrë tashmë dy herë dhe është e domosdoshme që të ecet përpara me zbatimin e plotë, pas vlerësimit nga partnerët ndërkombëtarë. Ai theksoi se gjatë kësaj periudhe janë diskutuar edhe “disa hapa shtesë” që duhet të ndërmerren nga institucionet. I pyetur për kohëzgjatjen dhe natyrën e këtyre negociatave, Orav konfirmoi se ato kanë zgjatur rreth dy muaj dhe nuk janë bërë publike. “Negociatat e tilla nuk zhvillohen në publik, pasi mungesa e diskrecionit mund të pengojë arritjen e rezultateve”, deklaroi ai, duke shtuar se në proces kanë qenë të përfshirë edhe përfaqësues të komunitetit ndërkombëtar, përfshirë palën gjermane. Këto deklarata kanë ngritur pikëpyetje mbi transparencën e procesit dhe mënyrën e arritjes së marrëveshjeve të rëndësishme që prekin politika shtetërore. — Dragash Info