Skandal – Kurti njeh strukturat ilegale të Serbisë

Kurti: Dokumentet e strukturave ilegale mund të përdoren vetëm për identifikim gjatë zbatimit të Ligjit për të Huajt Kryeministri i Kosovës, Albin Kurti, ka bërë të ditur se nga 15 marsi do të nisë zbatimi i plotë i Ligjit për të Huajt dhe Ligjit për Automjetet, duke theksuar se procesi do të zhvillohet në koordinim me përfaqësuesit ndërkombëtarë dhe me përfaqësuesit e komunitetit serb në Kosovë. Pas takimit me të dërguarin e posaçëm të Bashkimit Evropian për dialogun Kosovë–Serbi, Peter Sørensen, Kurti deklaroi se faza e parë e zbatimit të këtyre ligjeve ka nisur më 15 janar, ndërsa institucionet tashmë kanë bërë përgatitjet për hyrjen në fuqi të plotë të tyre. Sipas tij, gjatë procesit të zbatimit do të merren lista nga përfaqësuesit lokalë të komunave me shumicë serbe, ku përfshihen stafi akademik dhe ai shëndetësor që janë të angazhuar në ofrimin e shërbimeve në Kosovë. Këto lista do të shërbejnë si bazë për dhënien e lejeve të përkohshme të qëndrimit për qytetarët e huaj që aplikojnë në Ministria e Punëve të Brendshme e Kosovës. Kurti ka theksuar se dokumentet e lëshuara nga strukturat e Serbisë në Kosovë mund të përdoren vetëm për qëllime identifikimi gjatë procesit të regjistrimit dhe jo si dokumente zyrtare të vlefshme në sistemin ligjor të Kosovës. “Qeveria do të pajiset nga krerët lokalë me listat e stafit akademik dhe shëndetësor që janë të angazhuar në ofrimin e këtyre shërbimeve. Këto lista do të shërbejnë si bazë për dhënien e lejeve të përkohshme të qëndrimit për qytetarët e huaj që aplikojnë në Ministrinë e Punëve të Brendshme. Mospërputhjet eventuale në raste individuale do të verifikohen nga autoritetet përkatëse”, ka deklaruar Kurti. Ky proces lidhet me zbatimin gradual të Ligjit për të Huajt dhe synon rregullimin e statusit të qytetarëve të huaj që punojnë ose studiojnë në Kosovë, duke siguruar vazhdimësinë e shërbimeve në sektorin e arsimit dhe shëndetësisë. — Dragash Info