Sekuestrohen katër armë dhe municion në Prizren – tre persona ndalohen për përdorim të armëve Prizren, 05 janar 2026…
Sekuestrohen katër armë dhe municion në Prizren – tre persona ndalohen për përdorim të armëve
Prizren, 05 janar 2026
Festimet e ndërrimit të viteve në rajonin e Prizrenit kanë kaluar kryesisht pa incidente madhore dhe në një atmosferë festive.
Megjithatë, Policia e Kosovës ka raportuar se jo të gjithë qytetarët kanë respektuar ligjin gjatë këtyre festimeve.
Sipas njoftimit zyrtar, gjatë kësaj periudhe janë raportuar gjithsej pesë raste të shtënash me armë zjarri, prej të cilave tre raste kanë qenë të shtëna festive.
Si rezultat i veprimeve policore, janë sekuestruar katër armë zjarri dhe një sasi e municionit. Disa persona janë arrestuar, ndërsa tre prej tyre janë ndaluar për 48 orë, me vendim të organeve kompetente.
Lidhur me rastet e evidentuara, ndaj të gjithë personave të përfshirë është iniciuar procedurë penale dhe pritet ngritja e kallëzimeve penale përkatëse.
Policia e Kosovës ka rikujtuar se përdorimi i armëve të zjarrit dhe mjeteve të rrezikshme është i kundërligjshëm dhe paraqet rrezik serioz për jetën dhe pronën e qytetarëve. Sipas policisë, përdorimi i armëve për festime bie ndesh me ligjin dhe ndaj çdo shkelësi do të ndërmerren veprimet e nevojshme ligjore, pa përjashtim.
Mesazhi i Policisë së Kosovës për qytetarët: “Festo me zemër, jo me armë.”
— Dragash Info
