Sanohet defekti në Orçushë: Transformatori i ri vihet më në fund në funksion Pas tri ditësh pa energji elektrike, ban…
Sanohet defekti në Orçushë: Transformatori i ri vihet më në fund në funksion
Pas tri ditësh pa energji elektrike, banorët e fshatit Orçushë në Komunën e Dragashit janë furnizuar sërish me rrymë.
Shkak për ndërprerjen ishte djegia e transformatorit të vjetër, i cili kishte kapacitet të pamjaftueshëm. Edhe pse Komuna e Dragashit kishte siguruar një transformator të ri qysh para gati dhjetë vitesh, ai nuk ishte vënë në funksion për shkak të problemeve teknike në lidhje me rrjetin.
Falë iniciativës së afaristit lokal Bajram Jahija, i cili iu drejtua Zyrës për Komunitete dhe kryetarit të Komunës së Dragashit, u ndërmorën veprime urgjente për zgjidhjen e problemit. Kontribut të rëndësishëm dha edhe deputetja Duda Balje, e cila përmes ndërhyrjes së saj pranë institucioneve përkatëse në kompaninë KEDS mundësoi daljen e ekipeve në terren.
Punëtorët e KEDS-it kanë realizuar një lidhje të përkohshme për të siguruar furnizimin sa më të shpejtë me energji elektrike për banorët e fshatit. Sapo të përmirësohen kushtet atmosferike, pritet që të bëhet funksionimi i plotë dhe përfundimtar në transformatorin e ri.
Banorët e Orçushës kanë shprehur mirënjohje për deputeten Duda Balje, afaristin Bajram Jahija, si dhe për të gjithë ata që kontribuuan në zgjidhjen e këtij problemi.
Lajmin e ka bërë të ditur Uzair Hamza, drejtor i Zyrës për Komunitete në Komunën e Dragashit.
— Dragash Info
