Reshjet e mëdha të shiut bllokojnë trafikun në autostradën Prizren–Prishtinë Reshjet e dendura të shiut që kanë nisur…
Reshjet e mëdha të shiut bllokojnë trafikun në autostradën Prizren–Prishtinë
Reshjet e dendura të shiut që kanë nisur mbrëmë në Kosovë po vazhdojnë edhe sot, duke shkaktuar vështirësi të konsiderueshme në qarkullimin rrugor.
Situata më problematike raportohet në autostradën Prizren–Prishtinë, veçanërisht në segmentin pranë Aeroportit Ndërkombëtar të Prishtinës, ku si pasojë e ujërave të grumbulluara në sipërfaqen e rrugës, trafiku është vështirësuar ndjeshëm.
Uji i mbledhur në disa pjesë të autostradës ka penguar lëvizjen normale të automjeteve, duke krijuar kolona të gjata dhe vonesa për drejtuesit e mjeteve. Shoferët janë detyruar të lëvizin me shpejtësi të reduktuar për shkak të rrezikut nga rrëshqitjet dhe humbja e kontrollit të automjetit.
Autoritetet u bëjnë thirrje qytetarëve që të tregojnë kujdes të shtuar gjatë vozitjes, të respektojnë rregullat e trafikut dhe të përshtatin shpejtësinë me kushtet atmosferike, derisa situata të normalizohet.
— Dragash Info