REAGIM PUBLIK: Qëndrim ndaj votimit në Kuvend për rezolutat Pas miratimit të rezolutave në Kuvendin e Kosovës dhe në…
REAGIM PUBLIK: Qëndrim ndaj votimit në Kuvend për rezolutat
Pas miratimit të rezolutave në Kuvendin e Kosovës dhe në Kuvendin e Shqipërisë për mbrojtjen e ish-krerëve të UÇK-së, ka ardhur një reagim publik nga Safet Kuši, i cili ka shprehur qëndrimin e tij personal dhe, siç thekson ai, të qytetarëve të Gorës.
Në reagim thuhet se është e papranueshme mos-pjesëmarrja në votim e deputetit të komunitetit gorani, Adem Hoxha, si për rezolutën në mbrojtje të ish-liderëve të UÇK-së, ashtu edhe për rezolutën mbi gjenocidin në Srebrenicë.
Sipas reagimit, një veprim i tillë konsiderohet i papërgjegjshëm dhe i dëmshëm për interesat e komunitetit goran, duke theksuar se ky qëndrim nuk përfaqëson vullnetin e qytetarëve të Gorës. Më tej, në deklaratë thuhet se veprime të tilla thellojnë ndarjet, nxisin tensione dhe dëmtojnë besimin ndëretnik në rajonin e Gorës dhe në Kosovë.
Në reagim theksohet se qytetarët e Gorës respektojnë të vërtetën, drejtësinë dhe proceset institucionale, duke mbështetur rezolutën për gjenocidin në Srebrenicë si dhe të drejtën e ish-krerëve të UÇK-së që mbrojtjen e tyre ta realizojnë përmes proceseve gjyqësore në Hagë.
Gjithashtu, në fund të reagimit përmendet se Adem Hoxha konsiderohet, sipas autorit të deklaratës, si deputet i dirigjuar nga Milan Radojičić, për të cilin në Kosovë është shpallur fletarrest ndërkombëtar.
Në fund të reagimit shkruan:
“Në emrin tim personal dhe në emër të qytetarëve të Gorës”
Safet Kuši
— Dragash Info
