Raporti ndërkombëtar nxjerr në pah sfidat ekonomike dhe institucionale në Kosovë

Raporti ndërkombëtar nxjerr në pah sfidat ekonomike dhe institucionale në Kosovë Të dhënat e fundit ndërkombëtare, përfshirë raportin e Bertelsmann Stiftung për BTI 2026 Country Report – Kosovo, evidentojnë një sërë sfidash ekonomike dhe institucionale me të cilat përballet Kosova. Sipas këtij raporti, megjithëse janë shënuar rritje në investimet e huaja direkte, struktura e tyre mbetet kryesisht e orientuar në sektorin e pasurive të paluajtshme, duke kufizuar ndikimin në zhvillimin prodhues dhe industrial të vendit. Raporti thekson gjithashtu varësinë e lartë nga remitancat e diasporës, të cilat në pjesën më të madhe përdoren për konsum, ndërsa ndikimi në investime zhvillimore mbetet i kufizuar. Një ndër sfidat kryesore mbetet tregu i punës, ku papunësia e të rinjve vazhdon të jetë në nivel të lartë, duke ndikuar drejtpërdrejt në rritjen e emigrimit. Sipas të dhënave të raportit, një numër i konsiderueshëm qytetarësh kanë lënë vendin në vitet e fundit. Në aspektin institucional, raporti evidenton dobësi në sundimin e ligjit dhe sfida të vazhdueshme në luftën kundër korrupsionit, çka ndikon në besimin e qytetarëve dhe klimën për investime. Po ashtu, përmendet edhe përkeqësimi i treguesve për lirinë e mediave dhe transparencën, duke ngritur shqetësime për zhvillimin demokratik. Sipas vlerësimeve të Bertelsmann Stiftung, pa reforma të thella strukturore dhe forcim të institucioneve, vendi rrezikon të përballet me një rritje ekonomike të brishtë dhe sfida të vazhdueshme në konsolidimin demokratik. — Dragash Info