LVV shpenzoi mbi 4.5 milionë euro gjatë vitit 2025, mbi 120 mijë euro për reklama në media

LVV shpenzoi mbi 4.5 milionë euro gjatë vitit 2025, mbi 120 mijë euro për reklama në media Lëvizja Vetëvendosje ka shpenzuar gjithsej 4 milionë e 509 mijë euro gjatë vitit 2025, duke u bërë partia me shpenzimet më të mëdha në vend për këtë periudhë. Sipas të dhënave financiare, kjo shumë është pothuajse trefish më e lartë krahasuar me vitin 2024, kur kjo parti kishte shpenzuar rreth 1 milionë e 805 mijë euro. Në krahasim me partitë tjera politike në Kosovë, shpenzimet e LVV-së janë dukshëm më të larta. Partia Demokratike e Kosovës gjatë vitit 2025 ka shpenzuar 2 milionë e 166 mijë euro, Lidhja Demokratike e Kosovës 1 milionë e 335 mijë euro, ndërsa Aleanca për Ardhmërinë e Kosovës ka raportuar shpenzime prej 531 mijë euro. Nga raporti financiar rezulton se në fund të vitit LVV ka dalë edhe me deficit prej 2 milionë e 323 mijë euro. Partia kishte 2 milionë e 185 mijë euro të hyra, ndërsa shpenzimet arritën në 4 milionë e 509 mijë euro. Sa i përket kategorive të shpenzimeve: 929 mijë euro janë shpenzuar për paga dhe kompensime, 132 mijë euro për transport, 297 mijë euro për reklama, reprezentacion dhe konferenca. Një pjesë e konsiderueshme e buxhetit është shpenzuar edhe për reklama në media. Sipas të dhënave: 95 mijë euro janë paguar për Koha Group, 13 mijë euro për Kosovanews, 11 mijë e 530 euro për Radio Televizioni i Kosovës, 5 mijë euro për portalin Telegrafi. Gjithashtu, pagesë nga LVV gjatë vitit 2025 ka marrë edhe kompania e sondazheve UBO Consulting, e cila ka përfituar 25 mijë euro për shërbimet e saj, ndonëse në të kaluarën ishte kritikuar publikisht nga kryeministri Albin Kurti pas publikimit të disa sondazheve zgjedhore. — Dragash Info 📰