KANDIQ KRITIKON EKSPOZITËN PËR MASAKRAT NË KOSOVË: “MUNGON PROFESIONALIZMI, NË DUBRAVË NDODHËN GJËRA TË TMERRSHME”

KANDIQ KRITIKON EKSPOZITËN PËR MASAKRAT NË KOSOVË: “MUNGON PROFESIONALIZMI, NË DUBRAVË NDODHËN GJËRA TË TMERRSHME” Aktivistja serbe për të drejtat e njeriut, Natasha Kandić, ka reaguar lidhur me ekspozitën “Masakrat në Kosovë 1998–1999”, e cila ka nxitur reagime të shumta në opinionin publik për mënyrën e paraqitjes së ngjarjeve historike. Gjatë një lidhjeje direkte në emisionin Rubikon në Klan Kosova, Kandiq theksoi se është thelbësore që temat e ndjeshme të trajtohen mbi baza të sakta dhe të verifikueshme. Sipas saj, ekspozita lë hapësirë për kritika serioze për shkak të mungesës së një qasjeje profesionale, duke shtuar se prezantimi vetëm me shifra dhe pa kontekst konkret për viktimat është i papranueshëm. Ajo u ndal veçanërisht te rasti i Burgu i Dubravës, duke theksuar se mënyra e paraqitjes së ngjarjeve aty nuk pasqyron realitetin dhe kompleksitetin e asaj që ka ndodhur. “Është e papranueshme të paraqiten viktimat vetëm si numra, pa u sqaruar rrethanat dhe përgjegjësitë. Në Dubravë dhe në vende të tjera kanë ndodhur gjëra të tmerrshme, të cilat duhet të trajtohen me seriozitet dhe ndjeshmëri”, u shpreh Kandiq. Ajo gjithashtu nënvizoi se një ekspozitë e tillë duhet të ndihmojë në kuptimin e së vërtetës dhe jo të krijojë paqartësi apo interpretime të gabuara mbi ngjarjet e luftës. — Dragash Info