Kajtazi bën thirrje për protesta: “Albin Kurti nuk rrëzohet me votë, por në rrugë” Gazetari Vehbi Kajtazi ka bërë thi…
Kajtazi bën thirrje për protesta: “Albin Kurti nuk rrëzohet me votë, por në rrugë”
Gazetari Vehbi Kajtazi ka bërë thirrje publike për mobilizim qytetar dhe protesta, duke deklaruar se kryeministri Albin Kurti, sipas tij, nuk mund të rrëzohet nga pushteti përmes votës, por vetëm përmes presionit qytetar në rrugë.
Në një postim në rrjetet sociale, Kajtazi ka shprehur bindjen se përderisa në skenën politike vazhdojnë të jenë të pranishme partitë opozitare PDK, LDK dhe AAK, nuk është e mundur rrëzimi i qeverisë aktuale.
Sipas tij, opozita duhet fillimisht të “çlirohet” nga këto parti, e më pas të organizohet për veprim kundër pushtetit të Albin Kurtit.
“Pa u zhduk nga skena politike PDK, LDK dhe AAK, kurrë nuk rrëzohet nga pushteti diktatorci Albin Kurti”, ka shkruar Kajtazi.
“Autokratët nuk rrëzohen me votë”
Kajtazi ka theksuar se, sipas tij, historia ka treguar se asnjë autokrat nuk është rrëzuar përmes zgjedhjeve, por vetëm përmes protestave dhe presionit qytetar.
“Kurrë, asnjëherë, asnjë autokrat nuk është rrëzuar me votë. Ata rrëzohen ashtu siç kanë ardhur në pushtet – në rrugë, me protesta”, ka shkruar ai.
Në deklarimet e tij, Kajtazi ka bërë edhe krahasime me zhvillime ndërkombëtare, duke përmendur situatën në Venezuelë dhe rastin e presidentit Nicolás Maduro.
Thirrje për dalje në rrugë
Gazetari ka paralajmëruar se do të marrë pjesë personalisht në protesta dhe ka bërë thirrje për dalje në sheshe kundër qeverisë aktuale.
“Ne nuk kemi nevojë ta presim askënd nga jashtë. Ne e rrëzojmë vetë diktatorcin Kurti. Prandaj, do të jemi në rrugë. Unë do të jem aty”, ka shkruar Kajtazi.
Deklaratat e tij kanë nxitur reagime të shumta në opinionin publik dhe në rrjetet sociale, ndërsa mbetet të shihet nëse thirrja e tij do të pasohet me veprime konkrete në terren.
— Dragash Info