Bien çmimet e naftës pasi disa anije kalojnë në Ngushticën e Hormuzit

Bien çmimet e naftës pasi disa anije kalojnë në Ngushticën e Hormuzit Çmimet e naftës në tregjet ndërkombëtare kanë shënuar rënie të hënën, pasi disa anije arritën të lundrojnë nëpër Ngushticën e Hormuzit, një nga rrugët më të rëndësishme detare për transportin e energjisë në botë. Sipas raportimeve të agjencisë së lajmeve Reuters, çmimi i naftës së papërpunuar në bursën “Brent” ra me rreth 2.8 për qind, duke arritur në 100.21 dollarë për fuçi. Ndërkohë, nafta amerikane “West Texas Intermediate” (WTI) pësoi një rënie edhe më të madhe, prej 5.3 për qind, duke zbritur në 93.5 dollarë për fuçi. Analistët vlerësojnë se rënia më e theksuar e çmimit në tregun amerikan lidhet me prodhimin pothuajse rekord në Shtetet e Bashkuara, si dhe me importet nga Venezuela dhe lirimin e pritshëm të naftës nga Rezerva Strategjike e SHBA-së. Situata në tregun e energjisë mbetet e paqëndrueshme për shkak të tensioneve në Lindjen e Mesme. Presidenti amerikan Donald Trump u ka bërë thirrje aleatëve të SHBA-së të ndihmojnë në sigurimin e Ngushticës së Hormuzit, megjithëse disa vende nuk kanë shprehur gatishmëri për t’u përfshirë më shumë në këtë operacion. Ngushtica e Hormuzit është një pikë strategjike për tregtinë globale të energjisë, pasi rreth 20 për qind e naftës dhe gazit të lëngshëm në botë kalon përmes kësaj rruge detare. — Dragash Info