Afera e Rezervës Shtetërore: Si u avancua gjyqtari që refuzoi të urdhëronte arrestimin e Albin Kurtit Gjyqtari Valon…
Afera e Rezervës Shtetërore: Si u avancua gjyqtari që refuzoi të urdhëronte arrestimin e Albin Kurtit
Gjyqtari Valon Kurtaj është gradua në Departamentin Special të Gjykatës së Apelit, pavarësisht përfshirjes së tij në rastin e dështimit të dërgimit të kryeministrit Albin Kurti për t’u paraqitur si dëshmitar në Prokurori, lidhur me hetimet për Rezervën Shtetërore.
Në kulmin e hetimeve për këtë rast, ku Kurti ishte ftuar si dëshmitar, Prokuroria Speciale kërkoi më 14 shkurt 2025 nga gjyqtari Kurtaj lëshimin e urdhrit për paraqitjen e kryeministrit me detyrim. Shtatë ditë më vonë, gjyqtari kishte lëshuar urdhrin, por Kurti nuk u paraqit, pavarësisht gjobës prej 250 eurosh dhe vendimeve të Kolegjeve të Gjykatës Themelore në Prishtinë.
Sipas nenit 132 të Kodit të Procedurës Penale, gjyqtari kishte mundësi të urdhëronte burgimin e dëshmitarit për mosparaqitje, por këtë masë nuk e zbatoi. Megjithatë, katër muaj më vonë, Këshilli Gjyqësor i Kosovës (KGjK) e avancoi Kurtajn në Gjykatën e Apelit, duke e vlerësuar me pikë maksimale për performancën e tij.
Gjyqtari Kurtaj ka nisur detyrën e re në Departamentin Special të Apelit më 1 shtator 2025, ndërsa pak më shumë se një muaj më vonë, Prokuroria Speciale ngriti aktakuzë lidhur me skandalin e Rezervave Shtetërore.
Sipas aktakuzës, ministrja Rozeta Hajdari, Irfan Lipovica dhe Hafiz Gara akuzohen për keqpërdorim të detyrës zyrtare për përfitim pasuror të palëve të treta, duke shkaktuar dëme ndaj buxhetit të Kosovës prej rreth 2.9 milionë euro.
Gjykimi për këtë rast ka filluar më 13 janar 2026. Seanca fillestare ishte mbyllur për publikun për shkak të kërkesave të mbrojtjes dhe klasifikimit të dosjeve si Sekret Shtetëror, ndërsa ministrja Hajdari nuk ishte e pranishme në fillim të procesit.
Rasti i Rezervës Shtetërore konsiderohet si një nga skandalet më të mëdha të ekzekutivit të Kosovës, duke ngjallur shqetësime për përgjegjësinë institucionale dhe funksionimin e drejtësisë.
— Dragash Info