BE-ja premton 620 milionë euro ndihmë shtesë për Sirinë Bashkimi Evropian ka premtuar 620 milionë euro ndihmë shtesë…
BE-ja premton 620 milionë euro ndihmë shtesë për Sirinë
Bashkimi Evropian ka premtuar 620 milionë euro ndihmë shtesë financiare për Sirinë gjatë këtij viti dhe vitit të ardhshëm. Lajmi u bë i ditur nga presidentja e Komisioni Evropian, Ursula von der Leyen, gjatë një vizite zyrtare sot në Damask.
Von der Leyen deklaroi se kjo mbështetje financiare do t’i ndihmojë autoritetet siriane në rikthimin e shërbimeve bazë dhe rindërtimin e institucioneve shtetërore, duke krijuar kushte që qindra mijëra refugjatë të kthehen në vendin e tyre.
“Më shumë se një vit më parë, pas dekadash frike, heshtjeje dhe dhune shtetërore, më në fund është hapur një dritare shprese dhe mundësie për ripërtëritje”, tha ajo, duke theksuar se pajtimi dhe rimëkëmbja do të jenë procese të gjata dhe sfiduese.
Ajo shtoi se BE-ja është e përkushtuar të punojë për një Siri të re, paqësore, gjithëpërfshirëse dhe të sigurt, si dhe të krijojë perspektivë reale për kthimin e refugjatëve sirianë nga vendet evropiane.
Ndërkohë, presidenti i Këshilli Evropian, António Costa, i cili po qëndronte për vizitë së bashku me Von der Leyen, tha pas takimit me presidentin e përkohshëm sirian Ahmed al-Sharaa se për Sirinë është hapur një epokë e re shprese.
“BE-ja do t’i mbështesë përpjekjet drejt ndërtimit të një Sirie paqësore dhe gjithëpërfshirëse”, tha Costa.
Bashkimi Evropian ka hequr plotësisht sanksionet ndaj Sirisë pas rrëzimit të regjimit të Bashar al-Assad në fund të vitit 2024, ndërsa bashkëpunimi politik dhe institucional mes palëve po zgjerohet.
Sipas Komisionit Evropian, po planifikohet krijimi i një partneriteti të ri politik, i cili pritet të nisë në gjysmën e parë të këtij viti me një takim të nivelit të lartë mes përfaqësuesve të BE-së dhe Sirisë. Po ashtu, po shqyrtohet edhe rifillimi i një marrëveshjeje për bashkëpunim ekonomik.
— Dragash Info