Gjyqi ndaj katër udhëheqësve të UÇK-së në Hagë: Hulumtuesja e Tribunalit flet për pritjet dhe sfidat e procesit Gjyqi…
Gjyqi ndaj katër udhëheqësve të UÇK-së në Hagë: Hulumtuesja e Tribunalit flet për pritjet dhe sfidat e procesit
Gjyqi ndaj ish-presidentit Hashim Thaçi dhe ish-krerëve të UÇK-së, Kadri Veseli, Jakup Krasniqi dhe Rexhep Selimi, është duke u afruar drejt fazës vendimtare, ku në pranverë pritet të shpallet vendimi i instancës së parë.
Katër të akuzuarit ndodhen në paraburgim në Hagë që nga nëntori i vitit 2020.
Në një intervistë për KosovaPress, hulumtuesja e Tribunalit të Hagës për ish-Jugosllavi, Nevenka Tromp, ka theksuar rëndësinë e këtij vendimi dhe ka kritikuar efikasitetin e Gjykatës Speciale gjatë këtyre viteve. Sipas saj, procesi ka qenë i ngadalshëm, me vetëm gjashtë të akuzuar, ndërsa për katër personat kryesorë ende nuk ka vendim të instancës së parë.
Tromp ka vënë në dukje se trajtimi i katër të akuzuarve ka qenë i rreptë, duke përfshirë refuzimin e lejeve humanitare për të vizituar familjarët e sëmurë ose për funeralet. Ajo tha se kjo pjesë është esenciale për të garantuar një gjyq të drejtë, sipas standardeve ndërkombëtare.
Gjykata Speciale ka qenë gjithashtu e kritikuar për redaktime të shumta dhe mbyllje për publikun, si dhe për pranimin e dokumenteve nga autoritetet e Serbisë, të cilat sipas Tromp nuk mund të konsiderohen neutrale.
Procesi ndaj Thaçit, Veselit, Selimit dhe Krasniqit është pjesë e një gjyqi më të gjerë që përfshin edhe Pjetër Shalën, i cili është dënuar me 13 vjet, dhe Salih Mustafën, i dënuar me 15 vjet. Vendimi ndaj katër të akuzuarve pritet të ndikojë ndjeshëm në situatën politike dhe juridike të Kosovës.
Tromp thekson se pasojat për shtetin do të jenë të mëdha në rast se prokuroria fiton të drejtën për mbështetje të akuzave, ndërsa mbrojtja e katër udhëheqësve i ka konsideruar akuzat si të pabazuara, duke argumentuar se UÇK-ja nuk kishte një strukturë të organizuar komanduese.
Gjyqi ndaj tyre ka nisur më 3 prill 2023, dhe vitin e kaluar ka nxitur protesta në Prishtinë, Hagë, Tiranë, Strasburg e Shkup, me thirrje “Drejtësi për Çlirimtarët”.
— Dragash Info