Shaqir Totaj priti drejtuesit e Këshillit të Bashkësisë Islame të Prizrenit, rikonfirmohet bashkëpunimi institucional
Kryetari i Komunës së Prizren, Shaqir Totaj, ka pritur sot në një takim zyrtar kryetarin e Këshillit të Bashkësisë Islame të Prizrenit, Valon Ibrahimi, kryeimamin Orhan Bislimaj, si dhe bashkëpunëtorët e Këshillit të Bashkësisë Islame të Prizrenit.
Ky ishte takimi i parë ndërmjet palëve për këtë mandat, ku u diskutuan çështje me interes të përbashkët dhe u rikonfirmua bashkëpunimi i ndërsjellë ndërinstitucional.
Me këtë rast, kryetari Totaj ka shprehur gatishmërinë e Komunës së Prizrenit për thellimin e mëtejmë të bashkëpunimit me Këshillin e Bashkësisë Islame, në funksion të shërbimit ndaj komunitetit dhe forcimit të kohezionit shoqëror në qytet.
“Bashkëpunimi i mirë ndërmjet institucioneve komunale dhe Bashkësisë Islame është në interes të përbashkët dhe kontribuon drejtpërdrejt në mirëqenien e qytetarëve”, është theksuar gjatë takimit.
Takime të tilla vlerësohen si të rëndësishme për ndërtimin e dialogut të vazhdueshëm dhe koordinimin e aktiviteteve që ndikojnë pozitivisht në jetën fetare, kulturore dhe sociale të qytetit.
— Dragash Info
