DSB – Koalicioni VAKAT sqaron votimin për nënkryetarin e komuniteteve jo-shumicë në Prizren Prizren, 16 janar 2026 De…
DSB – Koalicioni VAKAT sqaron votimin për nënkryetarin e komuniteteve jo-shumicë në Prizren
Prizren, 16 janar 2026
Demokratska stranka Bošnjaka – Koalicioni VAKAT ka reaguar përmes një komunikate publike lidhur me votimin e sotëm për zgjedhjen e nënkryetarit të Komunës së Prizrenit nga radhët e komuniteteve jo-shumicë.
Sipas njoftimit, bazuar në vendimin e Kryesisë së Demokratska stranka Bošnjaka, asamblisti i Koalicionit VAKAT, Eldis Abazi, ka votuar në favor të kandidatit të komunitetit turk. Nga kjo parti bëhet e ditur se vendimi është marrë kolektivisht, në përputhje me vlerësimin politik dhe interesat e komunitetit boshnjak jo-shumicë, si dhe të vetë partisë.
“Z. Eldis Abazi ka vepruar plotësisht në përputhje me vendimin e organeve drejtuese të partisë dhe nuk mban asnjë përgjegjësi personale për votimin e sotëm”, thuhet në komunikatë.
DSB – Koalicioni VAKAT thekson se aktualisht komuniteti boshnjak në Komunën e Prizrenit përfaqësohet në pushtetin ekzekutiv përmes një drejtorie, e cila udhëhiqet nga drejtori Sead Arifi. Sipas tyre, marrja dhe udhëheqja e kësaj drejtorie është vlerësuar si me rëndësi të veçantë për komunitetin boshnjak, pasi mundëson një kontribut më konkret dhe më të dukshëm për qytetarët e Prizrenit.
Po ashtu, bëhet e ditur se drejtoria në fjalë ka filluar tashmë punën aktive dhe në një periudhë shumë të shkurtër ka pranuar disa kërkesa nga qytetarët, përfshirë edhe kërkesa që lidhen me problemet e shkaktuara nga rrëshqitjet e dheut dhe kushtet e pafavorshme atmosferike.
Në komunikatë përmendet edhe fakti se Memnuna Ajdini ishte zgjedhur nënkryetare e Komunës së Prizrenit më 28 dhjetor 2018, zgjedhje e cila, sipas DSB-së, nuk do të ishte e mundur pa mbështetjen e asamblistëve të komunitetit turk. Ky fakt, sipas tyre, dëshmon rëndësinë e bashkëpunimit dhe respektit të ndërsjellë ndërmjet komuniteteve jo-shumicë.
Në fund, DSB – Koalicioni VAKAT falënderon kryetarin e Komunës së Prizrenit dhe të gjithë partnerët e koalicionit për bashkëpunimin e deritanishëm, duke shprehur bindjen se bashkëpunimi dhe respekti i ndërsjellë do të kontribuojnë në përmirësimin e pozitës së të gjitha komuniteteve në Komunën e Prizrenit.
— Dragash Info