Balje: Dragashi dëshmon se politika mund të jetë humane dhe pranë qytetarëve Deputetja Duda Balje ka realizuar një vi…
Balje: Dragashi dëshmon se politika mund të jetë humane dhe pranë qytetarëve
Deputetja Duda Balje ka realizuar një vizitë zyrtare në Komunën e Dragashit, të cilën e ka cilësuar si një takim të sinqertë dhe domethënës me profesionistë që çdo ditë kujdesen për shëndetin dhe dinjitetin e qytetarëve.
Gjatë kësaj vizite, Balje u prit nga Drejtori i Drejtorisë së Shëndetësisë, Behar Brenoli, së bashku me stafin mjekësor të Spitalit të Dragashit. Ajo shprehu mirënjohje të veçantë për mikpritjen dhe bisedën e hapur me mjekët dhe personelin shëndetësor, duke theksuar humanizmin, profesionalizmin dhe përkushtimin e tyre ndaj pacientëve.
Një aspekt i veçantë i përmendur gjatë vizitës ishte fakti se në Spitalin e Dragashit trajtohen falas edhe pacientë nga Shqipëria, çka sipas Baljes përfaqëson një mesazh të fuqishëm solidariteti, humanizmi dhe bashkëpunimi rajonal. Spitali funksionon në një objekt të ri dhe modern, me ordinanca të reja për stomatologji dhe gjinekologji, si dhe me një muze unik të aparaturave të vjetra mjekësore, i cili ruan historinë dhe zhvillimin e profesionit mjekësor ndër vite.
Në kuadër të vizitës, deputetja Balje zhvilloi takime edhe me drejtorin e kadastrës, z. Bean, si dhe me drejtorin e Zyrës për Komunitete, Uzar Hamza. Në këto takime morën pjesë edhe drejtoresha e Inspektoratit të Komunës së Prizrenit, Samra Ilijazi, si dhe nënkryetari i partisë SDU, Admir Aljilji. Diskutimet u fokusuan në forcimin e institucioneve lokale, përmirësimin e shërbimeve publike dhe bashkëpunimin ndërmjet nivelit lokal dhe atij qendror.
Sipas Baljes, kjo vizitë dëshmon se SDU ka forcë, përgjegjësi dhe kapacitete në nivel lokal, duke e parë politikën si shërbim ndaj komunitetit dhe interesit të qytetarëve.
“Dragashi tregon se politika mund të jetë humane, e përgjegjshme dhe pranë qytetarëve”, ka deklaruar deputetja Duda Balje.
— Dragash Info
