Lista Srpska thirrje serbëve në Kosovë: Aplikoni për dokumente pas marrëveshjes me BE-në

Lista Srpska thirrje serbëve në Kosovë: Aplikoni për dokumente pas marrëveshjes me BE-në Pesë ditë pasi kryeministri Albin Kurti mundësoi lehtësira për pajisjen me dokumente, Lista Srpska ka reaguar duke u bërë thirrje qytetarëve serbë që të aplikojnë për dokumente të Kosovës. Kjo parti njoftoi se mbi 10 mijë serbë që deri më tani kanë qenë pa dokumente duhet të shfrytëzojnë mundësinë e re për t’u pajisur me to, duke theksuar se ky proces është i rëndësishëm për të siguruar qëndrimin e tyre në Kosovë dhe funksionimin normal të institucioneve shëndetësore dhe arsimore. Në reagimin e saj, Lista Srpska theksoi se marrëveshja e arritur mes Kosovës dhe Bashkimi Evropian është rezultat i një “beteje të vështirë diplomatike”, duke përmendur edhe mbështetjen e Beogradit zyrtar. Sipas njoftimit, qytetarët që jetojnë në Kosovë dhe nuk posedojnë dokumente mund të aplikojnë duke përdorur dokumente serbe si letërnjoftime, certifikata të lindjes, martesës apo vdekjes. Ndërkohë, personat që punojnë në institucione arsimore dhe shëndetësore, si dhe studentët që nuk jetojnë në Kosovë, do të kenë mundësi të marrin leje qëndrimi 12-mujore me të drejtë vazhdimi. Lista Srpska gjithashtu bëri të ditur se kryetarët e komunave me shumicë serbe do të angazhohen që procesi të zhvillohet pa pengesa, ndërsa afati për aplikim është caktuar deri më 16 qershor. Në fund, kjo parti njoftoi se po vazhdojnë përpjekjet për të gjetur një zgjidhje edhe për çështjen e automjeteve, me mbështetjen e përfaqësuesve ndërkombëtarë. — Dragash Info