Përgatitet për botim monografia e fshatit Bellobrad

Përgatitet për botim monografia e fshatit Bellobrad Po përgatitet për botim monografia kushtuar historisë dhe trashëgimisë së fshatit Bellobrad, një vepër studimore që synon të dokumentojë zhvillimin historik, kulturor dhe shoqëror të këtij vendbanimi ndër shekuj. Sipas historianit Muharrem Qafleshi, kjo monografi përmbledh të dhëna të rëndësishme mbi historinë e fshatit, duke u mbështetur në burime të ndryshme historike, gjetje arkeologjike, dokumente arkivore dhe dëshmi gojore të banorëve. Libri trajton periudha të ndryshme historike, nga antikiteti e deri në kohën bashkëkohore, duke ofruar një pasqyrë të gjerë mbi jetën dhe zhvillimin e Bellobradit. Në këtë studim trajtohen edhe gjurmët e hershme të vendbanimit, përfshirë lokalitetin arkeologjik “Gostil”, i cili konsiderohet dëshmi e vazhdimësisë së jetës në këtë hapësirë që nga periudha e antikitetit të vonë. Monografia ndalet gjithashtu te periudha e mesjetës, sundimi osman dhe zhvillimet historike që kanë ndikuar në jetën e popullsisë së kësaj treve. Një kapitull i veçantë i kushtohet edhe ngjarjeve tragjike të vitit 1913, kur gjatë pushtimit serb në Bellobrad u vranë dhjetëra banorë dhe u dogjën shumë shtëpi, duke lënë pasoja të rënda për komunitetin. Përveç historisë, monografia trajton edhe trashëgiminë kulturore dhe etnografike të fshatit, duke përfshirë veshjet tradicionale, folklorin, festat e motmotit, si dhe objekte të rëndësishme të kulturës tradicionale si mullinjtë e vjetër dhe Valavica. Kjo vepër synon të shërbejë si një dokument i rëndësishëm për ruajtjen e kujtesës historike të Bellobradit, duke ofruar një burim referimi për studiuesit dhe një dëshmi të vlefshme për brezat e ardhshëm mbi historinë dhe identitetin e këtij fshati. — Dragash Info