🗳️ Selmanaj: Nga vjedhja industriale e votave nĂ« 2010, nĂ« manipulim industrial nĂ« 2025 Kryetari i DegĂ«s sĂ« Lidhjes De…
🗳️ Selmanaj: Nga vjedhja industriale e votave në 2010, në manipulim industrial në 2025
Kryetari i Degës së Lidhjes Demokratike të Kosovës (LDK) në Prizren, Driton Selmanaj, ka reaguar ashpër lidhur me procesin zgjedhor, duke ngritur dyshime serioze për manipulim të organizuar të votave në nivel vendi, pas rinumërimit që po zhvillohet në disa komuna, përfshirë Prizrenin.
Selmanaj rikujton se menjëherë pas zgjedhjeve parlamentare të 9 shkurtit 2025, kishte reaguar publikisht duke shprehur dyshime për manipulim votash në Qendrat Komunale të Numrimit, në votat me postë dhe ato nga përfaqësitë diplomatike.
“Bashkë me disa kolegë ish-deputetë kërkuam rinumërim të përgjithshëm të votave, por u injoruam totalisht nga institucionet dhe subjektet politike”, thekson Selmanaj.
📌 Dyshime për skenar të përsëritur dhe të organizuar
Sipas tij, mungesa e reagimit institucional nga Komisioni Qendror i Zgjedhjeve (KQZ) dhe mungesa e vullnetit politik për zbardhjen e së vërtetës, i ka inkurajuar komisionerët që ta përsërisin të njëjtin skenar edhe në zgjedhjet e 28 dhjetorit 2025.
Selmanaj shprehet i bindur se ajo që po vërtetohet në Prizren nuk është rast i izoluar, por një fenomen që ka ndodhur në gjithë Kosovën.
“Rinumërimi po nxjerr të dhëna tejet shqetësuese. Të gjithë kandidatëve, nga të gjitha partitë politike, pa përjashtim, u janë prekur apo ndryshuar votat – disa me dallime të mëdha, disa më të vogla, por askush nuk i ka shpëtuar abuzimit”, deklaron ai.
Ky fakt, sipas Selmanajt, ngre dyshime për skenarë të mirëorganizuar për abuzim masiv, të shpërndarë në mënyrë të balancuar te të gjitha partitë dhe kandidatët, me qëllim që problemi të mos identifikohet lehtë.
🟦 Distancim dhe thirrje për drejtësi
Selmanaj thekson se këtij skenari nuk i ka shpëtuar as lista e kandidatëve të LDK-së, përfshirë edhe vetë atë si kandidat për deputet, duke u distancuar qartësisht nga çdo individ që ka tjetërsuar vullnetin e qytetarëve.
“Organet e drejtësisë duhet ta vërtetojnë këtë skenar dhe abuzuesit të marrin dënimin e merituar”, shton ai.
Ai u bën thirrje KQZ-së, Prokurorisë dhe institucioneve tjera kompetente që, në kuadër të përgjegjësive ligjore dhe kushtetuese, të ndërmarrin të gjitha veprimet e nevojshme për rikthimin e rregullsisë së procesit zgjedhor.
🇽🇰 “Mbrojtja e votës është mision patriotik”
Në reagimin e tij, Selmanaj thekson se vota e qytetarëve është e shenjtë dhe se mbrojtja e saj është detyrë e të gjithëve.
“Mbrojtja e rregullsisë së procesit, ku përmes votës shprehet vullneti politik i qytetarëve tanë, është misioni më patriotik që sot mund t’i bëjmë vendit tonë. Lidhja Demokratike e Kosovës duhet ta udhëheqë këtë mision”, shprehet ai.
Në fund, Selmanaj rithekson se rinumërimi i votave në gjithë Kosovën është e vetmja mënyrë për të zbardhur të vërtetën dhe për të rikthyer besimin e qytetarëve në procesin zgjedhor, duke shpresuar që institucionet dhe subjektet politike të mos e përsërisin gabimin e bërë pas zgjedhjeve të 9 shkurtit.
— Dragash Info